പ്രഷ്യ ബി എം

ഒരാൾ

അക്ഷമനായൊരാൾ വെയിലരികത്തു കാത്തു നിൽക്കുന്നു..
നിറം മങ്ങിയ ഒറ്റക്കടുക്കനിട്ടയാൾ, പൂണൂലിട്ടയാൾ..
വെന്തയാൾ
വെയിൽ കൊണ്ട് കറുത്തവൻ..
ഉണ്ടുറങ്ങിയ കുടവയറൻ..
ഇലയനക്കം തെറ്റാതെ കഴിഞ്ഞവൻ
മൃഷ്ടാന്നമുണ്ടാവൻ.. ഉണ്ണാത്തവൻ..
ഉണ്ണാതുറങ്ങാതെ തുട്ട് കൂട്ടിയവൻ.
കൃത്യഭക്ഷണക്ലാസ്സ്‌ മുടങ്ങാതെടുത്തവൻ.,
ഭിഷഗ്വരൻ..
ആൾദൈവകൊടുമുടികൾ..
ജാതിക്കോമരമിട്ടവൻ..
മതക്കണ്ണട ചൂടിയവൻ..
വെയിൽ മങ്ങി ഇരുള് മങ്ങി തീരും മുൻപ് കാത്തു നിന്നോരൊറ്റയാളെ
കാണാതെ കുടുക്കിട്ട് കൊണ്ട് പോകുന്നു..
കാത്തു നിന്നതൊരൊറ്റയാളെ
ഒരു" മനുഷ്യനെ ".....