Valliyumpulliyum 7

വായു മലിനീകരണം - ശ്വാസം മുട്ടുന്ന നഗരങ്ങൾ.

കനത്ത പുകയും പൊടിയും നിറഞ്ഞ ഒരു ബസ് സ്റ്റോപ്പ്. വള്ളി സാരിയുടെ തലപ്പുകൊണ്ട് മൂക്ക് പൊത്തിപ്പിടിച്ചിരിക്കുകയാണ്. പുള്ളി ഇടയ്ക്കിടെ ചുമയ്ക്കുന്നുണ്ട്.

വള്ളി: (ദേഷ്യത്തോടെ) "എടാ പുള്ളീ, ഈ നഗരത്തിൽ വന്നാൽ ശ്വാസം മുട്ടുകയാണല്ലോ! ഈ വണ്ടികളൊക്കെ ഇങ്ങനെ കരിമ്പുക വിട്ടാൽ നമ്മൾ മനുഷ്യന്മാർ എങ്ങനെ ജീവിക്കാനാ? പണ്ട് നമ്മുടെ നാട്ടിൽ ശുദ്ധവായു ശ്വസിച്ചു നടന്ന സുഖം ഇപ്പോഴുണ്ടോ?"

പുള്ളി: (ചുമയ്ക്കിടയിൽ) "അതെയതെ, വള്ളീ. ഇതിനെയാണ് 'എയർ പൊല്യൂഷൻ' എന്ന് പറയുന്നത്. കാറുകളും ഫാക്ടറികളും ഒക്കെ ചേർന്ന് ഈ ആകാശത്തെ മൊത്തം ഒരു പുകക്കുഴലാക്കി മാറ്റി. ശ്വസിക്കുന്നത് വായുവാണോ അതോ വിഷമാണോ എന്ന് പോലും തിരിച്ചറിയാൻ പറ്റുന്നില്ല."

വള്ളി: "ഇതൊക്കെ ഈ സർക്കാരുകാര് കാണുന്നില്ലേ? ഇത്രയും വണ്ടികൾ റോഡിൽ ഇറക്കാൻ സമ്മതിക്കരുത്. നമുക്ക് ഈ പുകയിൽ നിന്ന് എന്നാണ് ഒരു മോചനം കിട്ടുവാൻ പോകുന്നത് ?"

(ഈ സമയം മാസ്ക് ധരിച്ചുകൊണ്ട് ഞാൻ അവരുടെ അടുത്തേക്ക് ചെല്ലുന്നു)

ഞാൻ: "പുകയിൽ നിന്നുമൊരു മോചനം കിട്ടുവാൻ പ്രയാസമാണ് വള്ളീ, പക്ഷേ വായുവിൻ്റെ ഗുണനിലവാരം നമുക്ക് അളക്കാൻ പറ്റും. അതിനെയാണ് AQI (Air Quality Index) എന്ന് വിളിക്കുന്നത്. ഇന്ന് പല നഗരങ്ങളിലും ഇത് അപകടകരമായ നിലയിലാണ്."

വള്ളി: "എന്താ ഈ AQI? ഇതൊക്കെ അറിഞ്ഞതുകൊണ്ട് നമുക്ക് വായു കിട്ടുമോ?"

ഞാൻ: "AQI എന്നാൽ വായു എത്രത്തോളം ശുദ്ധമാണെന്ന് കാണിക്കുന്ന ഒരു അളവുകോലാണ്. പൂജ്യം മുതൽ അഞ്ഞൂറ് വരെയാണ് ഇതിൻ്റെ കണക്ക്. അമ്പതിൽ താഴെയാണെങ്കിൽ നല്ലത്. പക്ഷേ ദില്ലി പോലുള്ള നഗരങ്ങളിൽ ഇത് പലപ്പോഴും നാനൂറിന് മുകളിലെത്താറുണ്ട്. അതായത്, ഒരു ദിവസം പത്ത് സിഗരറ്റ് വലിക്കുന്നതിന് തുല്യമാണ് അവിടുത്തെ വായു ശ്വസിക്കുന്നത്!"

പുള്ളി: (പേടിയോടെ) "എൻ്റെ പൊന്നോ! അപ്പൊ നമ്മൾ പുകവലിച്ചില്ലെങ്കിലും ശ്വാസകോശം പണി തരുമെന്നാണോ മധ്യസ്ഥൻ പറയുന്നത്?"

ഞാൻ: "അതെ പുള്ളീ. വായുവിലുള്ള ചെറിയ പൊടിപടലങ്ങൾ (PM 2.5) നമ്മുടെ രക്തത്തിലേക്ക് നേരിട്ട് കലരാൻ സാധ്യതയുണ്ട്. ഇതിന് പരിഹാരം വണ്ടികൾ കുറയ്ക്കുക എന്നതുമാത്രമല്ല, വനവൽക്കരണവും പൊതുഗതാഗതവും പ്രോത്സാഹിപ്പിക്കുക എന്നതുകൂടിയാണ്."

വള്ളി: "അപ്പൊ നമ്മൾ ഇനി എന്ത് ചെയ്യണം? എപ്പോഴും ഈ മാസ്ക് വെച്ച് നടക്കണോ?"

ഞാൻ: "മാസ്ക് ഒരു താൽക്കാലിക രക്ഷയാണ് വള്ളീ. പക്ഷേ ദീർഘകാലാടിസ്ഥാനത്തിൽ നോക്കിയാൽ നമ്മൾ ഇലക്ട്രിക് വണ്ടികളിലേക്ക് മാറുന്നതും, വീട്ടുമുറ്റത്ത് ചെടികൾ വെച്ചുപിടിപ്പിക്കുന്നതും ഒക്കെ വലിയ മാറ്റമുണ്ടാക്കും. ഓരോരുത്തരും വിചാരിച്ചാലേ ഈ നഗരങ്ങളെ നമുക്ക് ശ്വാസം മുട്ടലിൽ നിന്ന് രക്ഷിക്കാൻ പറ്റൂ."

വള്ളി: (ആശ്വാസത്തോടെ) "ശരിയാ! അടുത്ത തവണ ടൗണിലേക്ക് വരുമ്പോൾ വണ്ടി എടുക്കാതെ ബസ്സിൽ വരാമെന്ന് ഞാനും തീരുമാനിച്ചു. കുറച്ചു പുകയെങ്കിലും കുറയുമല്ലോ!"

പുള്ളി: "അതാണ് വള്ളീ ബുദ്ധി! വാ, നമുക്ക് ആ പുകയില്ലാത്ത ഇടത്തേക്ക് ഒന്ന് മാറി നിൽക്കാം."

"പുതിയ കാര്യങ്ങളുമായി വള്ളിയും, പുള്ളിയും , പിന്നെ ഞാനും ഉടനെ വരുന്നതാണ് "

രഞ്ജിത്ത് മാത്യു