Valliyumpulliyum 6

ഹാലെറ്റ് കോവിലെ മഞ്ഞുരുകാത്ത ഓർമ്മകൾ


മനോഹരമായ കടൽത്തീരം. അങ്ങു ദൂരെ കപ്പലുകൾ നിര നിരയായി കടന്നുപോകുന്നു. ഹാലെറ്റ് കോവിലെ കടൽത്തീരത്തെ കാഴ്ച്കൾ എത്ര വർണ്ണിച്ചാലും വള്ളിയ്ക്ക് മടുപ്പില്ല. ആ ബീച്ച് അവൾക്ക് അത്രയേറെ ഇഷ്ടമാണ്. പക്ഷേ കൺസർവെർഷൻ പാർക്കിലെ ആ കുന്നിൻ മുകളിൽ അവൾ ആദ്യമായിട്ടാണ് കയറുന്നത്. അവിടെയാണ് ഷുഗർ ലോഫ്. വള്ളി അവിടുത്തെ വിചിത്രമായ ആകൃതിയുള്ള പാറകൾ നോക്കി കൗതുകത്തോടെ നിൽക്കുന്നു. അപ്പോഴാണ് വള്ളിയിൽ പുതിയ സംശയം ഉടലെടുത്തത്.

വള്ളി: "എടാ പുള്ളീ, ഇവിടെ വന്നിട്ട് എനിക്ക് എന്ത് കണ്ടിട്ടും ഒരു പിടിയും കിട്ടുന്നില്ലല്ലോ. ഈ പാറകളൊക്കെ ആരോ കൊത്തി വെച്ചതുപോലെ ഇരിക്കുന്നു. ഇതിനെന്താ ഇത്ര പ്രത്യേകത?"

പുള്ളി: "വള്ളീ, ഇത് വെറുമൊരു പാറയല്ല. ഇതിനെ 'ഷുഗർലോഫ്' (Sugarloaf) എന്നാണ് വിളിക്കുന്നത്. ലക്ഷക്കണക്കിന് വർഷങ്ങൾക്ക് മുൻപ് ഈ പ്രദേശം മൊത്തം മഞ്ഞുമൂടിക്കിടക്കുകയായിരുന്നു. ആ ഹിമയുഗത്തിൻ്റെ (Ice Age) അടയാളങ്ങളാണിവ."

വള്ളി: "മഞ്ഞോ? ഈ കടൽത്തീരത്തോ? നീ എന്നെ കളിയാക്കുകയാണോ? ഇവിടെയിപ്പോ നല്ല വെയിലാണല്ലോ!"

പുള്ളി എന്തൊക്കെയോ ആലോചിച്ചുകൊണ്ട് അങ്ങനെതന്നെ അവിടെ നിന്നു. കാഴ്ചകൾ കാണുവാനായി ഞാനും അപ്പോൾ അവിടെയുണ്ടായിരുന്നു.

ഉത്തരം കിട്ടാതായപ്പോൾ വള്ളിയ്ക്ക്, പുള്ളിയോട് ദേഷ്യവും , അരിശവും തോന്നി. അത് ചെറിയൊരു വഴക്കിൽ കലാശിച്ചു.

എന്താ പ്രശ്‍നം ... ഞാൻ അവരുടെ വഴക്കിൽ ഇടപെട്ടു. കേട്ട കാര്യങ്ങൾക്ക് മറുപടി കൊടുക്കുവാൻ ഞാൻ തയ്യാറായി.

ഞാൻ : "പുള്ളി പറഞ്ഞത് സത്യമാണ് വള്ളീ. ഏതാണ്ട് 280 ദശലക്ഷം വർഷങ്ങൾക്ക് മുൻപ് ഈ പ്രദേശം ഒരു വലിയ ഹിമാനിയുടെ (Glacier) അടിയിലായിരുന്നു. ആ മഞ്ഞുപാളികൾ നീങ്ങുമ്പോൾ പാറകളിൽ ഉണ്ടായ പോറലുകളും തേയ്മാനവുമാണ് നീ ഈ കാണുന്ന വിചിത്രമായ രൂപങ്ങൾ."

വള്ളി: "അതെയോ! അപ്പൊ ഈ കാണുന്ന 'ഷുഗർലോഫ്' പാറയ്ക്ക് ആ പേര് വന്നത് അത് കാണാൻ പഞ്ചസാരക്കട്ട പോലെ ഇരിക്കുന്നത് കൊണ്ടാണോ?"

ഞാൻ : "അതെ! പണ്ട് കാലത്ത് പഞ്ചസാര വച്ചിരുന്ന ആകൃതിയിലാണ് ഈ പാറ രൂപപ്പെട്ടിരിക്കുന്നത്. പ്രകൃതി തന്നെ ഒരു ശില്പിയെപ്പോലെ ഇവിടെ പണിയെടുത്തു എന്ന് പറയാം. ലോകത്തിലെ തന്നെ ഏറ്റവും പ്രധാനപ്പെട്ട ഭൗമശാസ്ത്ര കേന്ദ്രങ്ങളിൽ (Geological sites) ഒന്നാണിത്."

പുള്ളി: "കണ്ടോ വള്ളീ, നമ്മൾ ഈ കാണുന്ന ഓരോ കല്ലിനും ഓരോ കഥ പറയാനുണ്ട്. മഞ്ഞുരുകി പോയപ്പോൾ അവശേഷിച്ച ഈ കാഴ്ചകൾ കാണാൻ ലോകത്തിൻ്റെ പല ഭാഗത്തുനിന്നും ആളുകൾ ഇവിടെ വരുന്നുണ്ട്."

വള്ളി: "സമ്മതിച്ചു! പക്ഷേ പുള്ളീ, ഇത്രയും പഴയ കാര്യങ്ങൾ ഈ പാറകൾ എങ്ങനെ ഓർത്തു വെക്കുന്നു? ഇതിന് വല്ല മെമ്മറി കാർഡും ഉണ്ടോ?"

ഞാൻ : (ചിരിച്ചുകൊണ്ട്) "പാറകളുടെ അടുക്കുകൾ (Layers) പരിശോധിച്ചാൽ ശാസ്ത്രജ്ഞർക്ക് അക്കാലത്തെ കാലാവസ്ഥയും ജീവജാലങ്ങളും ഒക്കെ മനസ്സിലാക്കാൻ പറ്റും. പ്രകൃതിയുടെ ഒരു ഡയറി പോലെയാണത്. ഇവിടെയുള്ള പാറകളിൽ കാണുന്ന വരകൾ ഹിമാനികൾ എങ്ങോട്ടാണ് നീങ്ങിയത് എന്ന് പോലും പറഞ്ഞുതരും."

വള്ളി: "ഹോ! അപ്പൊ നമ്മൾ ഈ നടക്കുന്നത് ചരിത്രത്തിന് മുകളിലൂടെയാണല്ലേ? എനിക്ക് ആ പാറയുടെ കൂടെ ഒരു സെൽഫി എടുക്കണം. എന്നിട്ട് വേണം നാട്ടിലുള്ളവർക്ക് അയച്ചു കൊടുക്കാൻ!"

അതിൽ പിന്നീട് വള്ളി ഇപ്പോൾ ഓരോ പാറയെയും ബഹുമാനത്തോടെ നോക്കി കാണുകയാണ്!

(പുതിയ കാര്യങ്ങളുമായി വള്ളിയും, പുള്ളിയും, പിന്നെ ഞാനും ഉടനെ തന്നെ മടങ്ങി വരുന്നതാണ്. )