Valliyumpulliyum 5
Valliyumpulliyum pinne njaanum
വൈകുന്നേരം, വള്ളിയും പുള്ളിയും ഒരു മരച്ചുവട്ടിൽ ഇരിക്കുന്നു. പുള്ളി ഒരു ചെറിയ ചെസ്സ് ബോർഡിൽ കരുക്കൾ അടുക്കുന്നു.
വള്ളി: "ഇതെന്താ പുള്ളീ, നീ ഇപ്പോഴും ഈ കല്ലും കഷണവും നിരത്തി കളിക്കുകയാണോ? കുട്ടികളൊക്കെ മൈതാനത്ത് ഓടി നടന്നു കളിക്കുമ്പോൾ നീ എന്തിനാ ഈ ഒരിടത്ത് തന്നെ ഇരിക്കുന്നത്?"
പുള്ളി: "ഇത് വെറുമൊരു കളിയല്ല വള്ളീ, ഇതൊരു തലച്ചോറിൻ്റെ വ്യായാമമാണ്. ചെസ്സ് കളിക്കുന്ന കുട്ടികൾക്ക് ഏകാഗ്രതയും തീരുമാനമെടുക്കാനുള്ള കഴിവും കൂടും. നമ്മുടെ നാട്ടിൽ ഒരു ഗ്രാമം തന്നെ ഈ കളി കൊണ്ട് രക്ഷപ്പെട്ടിട്ടുണ്ട്, നീ കേട്ടിട്ടുണ്ടോ മരോട്ടിച്ചാലിനെ കുറിച്ച്?"
വള്ളി: "മരോട്ടിച്ചാലോ? അത് തൃശൂരിലുള്ള സ്ഥലമല്ലേ? അവിടെ എന്താ ചെസ്സ് ചെടികൾ ഉണ്ടോ?"
(ഞാൻ ചിരിച്ചുകൊണ്ട് അവരുടെ ഇടയിലേക്ക് നടന്നു ചെന്നു )
ഞാൻ : "ചെടികളല്ല വള്ളീ, അവിടെയുള്ളത് ചെസ്സ് കളിക്കാരാണ്! ഏതാണ്ട് 90 ശതമാനം ആളുകളും ചെസ്സ് കളിക്കുന്ന ലോകത്തിലെ തന്നെ അപൂർവ്വം ഗ്രാമങ്ങളിലൊന്നാണ് മരോട്ടിച്ചാൽ. ഏഷ്യയിലെ തന്നെ ആദ്യത്തെ 'ചെസ്സ് വില്ലേജ്' (Chess Village) എന്നാണിതിനെ വിളിക്കുന്നത്."
വള്ളി: "അതെങ്ങനെ പറ്റി? തൃശൂരുകാർക്ക് കളി എന്ന് വെച്ചാൽ ഫുട്ബോളും പൂരവും ഒക്കെയല്ലേ?"
ഞാൻ : "അതിനൊരു രസകരമായ ചരിത്രമുണ്ട്. പണ്ട് മരോട്ടിച്ചാലിൽ വ്യാജമദ്യവും ചീട്ടുകളിയും ഒക്കെ വലിയ പ്രശ്നമായിരുന്നു. അന്ന് അവിടെ ചായക്കട നടത്തിയിരുന്ന സി.ഉണ്ണികൃഷ്ണൻ എന്ന ഒരാളാണ് ഈ മാറ്റത്തിന് തുടക്കമിട്ടത്. അദ്ദേഹം ഗ്രാമവാസികളെ ചെസ്സ് പഠിപ്പിച്ചു. പതുക്കെ ആളുകൾ മദ്യപാനവും വഴക്കും നിർത്തി ചെസ്സ് ബോർഡിന് മുന്നിൽ ഇരിക്കാൻ തുടങ്ങി."
പുള്ളി: "കണ്ടോ വള്ളീ, ഒരു കളി കൊണ്ട് ഒരു ഗ്രാമം തന്നെ നന്നായി! ഇന്ന് അവിടുത്തെ കൊച്ചു കുട്ടികൾ മുതൽ 80 വയസ്സുള്ള കാരണവന്മാർ വരെ ഉഗ്രൻ ചെസ്സ് കളിക്കാരാണ്. ലോകമാധ്യമങ്ങൾ വരെ മരോട്ടിച്ചാലിനെ പറ്റി വാർത്തകൾ ചെയ്തിട്ടുണ്ട്."
വള്ളി: "സമ്മതിച്ചു! അപ്പൊ നമ്മുടെ ഈ പുള്ളി പറയുന്നതിൽ കാര്യമുണ്ട്. കുട്ടികൾക്ക് ഇത് പഠിക്കുന്നത് ഗുണമാണല്ലേ?"
ഞാൻ : "തീർച്ചയായും. കുട്ടികൾ ചെസ്സ് കളിക്കുമ്പോൾ അവർക്ക് 'ക്ഷമ' കൂടും. ഒരു നീക്കം നടത്തുന്നതിന് മുൻപ് അതിൻ്റെ ഫലം എന്തായിരിക്കും എന്ന് ആലോചിക്കാൻ അവർ പഠിക്കും. ഇത് അവരുടെ പഠനത്തിലും വലിയ മാറ്റങ്ങൾ ഉണ്ടാക്കും. കളിയിൽ തോറ്റാലും എങ്ങനെ തിരിച്ചു വരാം എന്ന് ചെസ്സ് പഠിപ്പിക്കും."
വള്ളി: "എങ്കിൽ പുള്ളീ, എനിക്കും കൂടെ ഒന്ന് പഠിപ്പിച്ചു തരുമോ? ആനയും കുതിരയും ഒക്കെ എങ്ങനെയാ നീങ്ങുന്നത് എന്ന് എനിക്കൊന്ന് പറഞ്ഞുതാ. എനിക്കും ഈ മരോട്ടിച്ചാൽ സ്റ്റൈലിൽ ഒന്ന് കളിക്കണം!"
വള്ളി ഇപ്പോൾ ഗൗരവമായി ചെസ്സ് പഠിക്കാൻ തുടങ്ങിയിരിക്കുകയാണ്! പുതിയ കഥകളുമായി ഞങ്ങൾ ഉടനെ തന്നെ തിരികെ വരുന്നതാണ്. കാത്തിരിക്കൂ കൂട്ടുകാരേ ...
