കടലൊഴിയുമ്പോൾ

ചിത്രശലഭച്ചിറകിലേറി ഹൃദയത്തിൽ പറന്നിറങ്ങുന്ന കവിതകൾ: 'കടലൊഴിയുമ്പോൾ' നിരൂപണം
പുസ്തകം: കടലൊഴിയുമ്പോൾ (കവിതാ സമാഹാരം)

പുസ്‌തക രചന: സിന്ധു സൂര്യ

അവതാരിക: പവിത്രൻ തീക്കുനി

പുസ്‌തക നിരൂപണം - രഞ്ജിത്ത് മാത്യു

പുസ്‌തക പ്രസാധകർ : കൈപ്പട പബ്ലിഷിംഗ് ഗ്രൂപ്പ് .

കവിതകൾ അധികം വായിക്കാത്തവരെപ്പോലും ആകർഷിക്കുന്ന ഒന്നാണ് സിന്ധു സൂര്യയുടെ 'കടലൊഴിയുമ്പോൾ' എന്ന കവിതാസമാഹാരം. മനോഹരമായ ഒരു ചിത്രശലഭത്തിൻ്റെ ആകൃതിയിൽ ഡിസൈൻ ചെയ്ത ഈ പുസ്തകത്തിൻ്റെ പുറംചട്ട തന്നെ വായനക്കാരിലേക്ക് കവിതയുമായി ഒരു പൂമ്പാറ്റയെപ്പോലെ പറന്നിറങ്ങാൻ കവയിത്രിക്ക് കഴിയുമെന്നതിൻ്റെ സൂചന നൽകുന്നുണ്ട്. ഒടുവിൽ വായന പൂർത്തിയാക്കുമ്പോൾ ആ അനുമാനം തികച്ചും ശരിയാണെന്ന് വായനക്കാരന് ബോധ്യപ്പെടുകയും ചെയ്യും.

നാൽപത്തിയാറ് കവിതകളുടെ ഹൃദ്യമായ ഒരു ശേഖരമാണ് ഈ പുസ്തകം. കവയിത്രിയുടെ വാക്കുകൾ കടമെടുത്തു പറഞ്ഞാൽ:

"എൻ്റെ വരികളിൽ തട്ടി ഹൃദയം പോറിയാൽ കുറ്റം എനിക്കാണ് ചില്ലിനല്ല. നിൻ്റെ വരികളിൽ തട്ടിയാണ് എൻ്റെ ഹൃദയം ചുവന്നത്... മുറിവാണെന്ന് തോന്നിയതേയില്ല"

ഈ വരികൾ വായനക്കാരൻ്റെ ഹൃദയത്തെയും ആഴത്തിൽ സ്പർശിക്കുന്ന ഒന്നാണ്. കവിതയുടെ വരികളിൽ തട്ടി വായനക്കാരൻ്റെ ഹൃദയം ചുവക്കുമ്പോഴും അതൊരു മുറിവായി തോന്നാത്ത വിധം ആർദ്രമാണ് സിന്ധു സൂര്യയുടെ കാവ്യപ്രപഞ്ചം. പ്രശസ്ത കവി പവിത്രൻ തീക്കുനി അവതാരികയിൽ കുറിച്ചതുപോലെ, "അതിജീവനത്തിൻ്റെ ആഗ്നേയ മന്ത്രങ്ങളായ കവിതകൾ" തന്നെയാണ് ഇതിലെ ഓരോ വരിയും.

പെൺമനസ്സിൻ്റെ ആഴങ്ങളും സാമൂഹിക യാഥാർത്ഥ്യങ്ങളും

'നിലാ, ആദ്യത്തെ പെൺകുഞ്ഞ്' എന്ന മനോഹരമായ കവിതയിലാണ് ഈ സമാഹാരം ആരംഭിക്കുന്നത്. തൊട്ടടുത്ത നിമിഷം തന്നെ സാമൂഹികമായ ചില നേർക്കാഴ്ചകളിലേക്ക് കവിയിത്രി വിരൽ ചൂണ്ടുന്നു. 'വളരെ ദൂരെ ചില കാഴ്ചകൾ കാണാം, തീർത്തും ഒറ്റപ്പെട്ടൊരുവൾ നിറം മങ്ങിയൊരു ചുവപ്പൻ കോട്ടൺ സാരിയിൽ മാറിടമൊതുക്കാതെ നടന്നു പോകുന്നത്...' എന്ന വരികളിലൂടെ സമൂഹത്തിൻ്റെ വിവേചനങ്ങളും ഒറ്റപ്പെടലുകളും കവിയിത്രി കൃത്യമായി അടയാളപ്പെടുത്തുന്നു.

'മദ്യപരോട്' എന്ന കവിത കപട സദാചാരബോധത്തിന് നേരെ തൊടുക്കുന്ന ശക്തമായ അമ്പാണ്.

"നിങ്ങടെ പെണ്ണുങ്ങൾ വീഞ്ഞു മേശയിൽ വിവരിക്കപ്പെടുകയും വിവസ്ത്രരാക്കപ്പെടുകയും ചെയ്യുമ്പോൾ നിങ്ങടെ കണ്ണിലന്ധത ചിരിക്കും."

മദ്യപാനത്തിൻ്റെ ലഹരിയിൽ സ്വന്തം അന്തസ്സും കൂടെയുള്ളവരുടെ ആത്മാഭിമാനവും പണയം വെക്കുന്നവരോടുള്ള ശക്തമായ പ്രതിഷേധം ഈ വരികളിൽ ജ്വലിച്ചു നിൽക്കുന്നു.

ശൂന്യതയുടെയും ഓർമ്മകളുടെയും കാവ്യാവിഷ്കാരം
സമാഹാരത്തിൻ്റെ ശീർഷക കവിതയായ 'കടലൊഴിയുമ്പോൾ' വായനക്കാരെ മറ്റൊരു ദാർശനിക തലത്തിലേക്ക് കൂട്ടിക്കൊണ്ടുപോകുന്നു.

"ഇത്ര വലിയ കടൽ പെട്ടെന്നൊരു നിമിഷം വറ്റിപ്പോയാൽ അനാവൃതമായിപ്പോകുന്ന കടൽ ശംഖുകളുടെ ലജ്ജ, അനാദിയായ രഹസ്യങ്ങളുടെ വിവസ്ത്ര മിഴികൾ..."

കടൽ പിൻവാങ്ങുമ്പോൾ അവശേഷിക്കുന്ന ശൂന്യതയെയും, അതുവരെ ഒളിച്ചുവെച്ച രഹസ്യങ്ങളുടെ വെളിപ്പെടുത്തലുകളെയും ഇത്രത്തോളം ലളിതമായും മനോഹരമായും ആവിഷ്കരിക്കാൻ കവയിത്രിക്ക് കഴിഞ്ഞിട്ടുണ്ട്.

ഈ കാവ്യയാത്ര അവസാനിക്കുന്നത് 'ഒച്ച' എന്ന കവിതയിലാണ്. വാർദ്ധക്യത്തിൻ്റെ ഏകാന്തതയും അമ്മയെന്ന വികാരവും ഈ കവിതയിൽ തുളുമ്പി നിൽക്കുന്നു.

"ഒച്ചയില്ലാത്തൊരു സന്ധ്യക്ക് അമ്മ ഉറങ്ങാൻ കിടക്കും, പൊട്ടിപ്പോയ മൺ റാന്തലിൻ്റെ വെളിച്ചം ഓർത്തെടുക്കും... കൂട്ടിപ്പിരിച്ച വിളക്കിത്തിരി എണ്ണയിൽ മുങ്ങി കിടക്കും പോലെ അമ്മ ഓർമ്മയിലാണ്ടു പോകും."

തീർത്തും നിശബ്ദമായൊരു സന്ധ്യയിൽ, ഓർമ്മകളുടെ റാന്തൽ വെളിച്ചത്തിൽ മുങ്ങിപ്പോകുന്ന അമ്മയുടെ ചിത്രം വായനക്കാരൻ്റെ കണ്ണുകളെ ഈറനണിയിക്കുന്നതാണ്.

ഉപസംഹാരമായി എനിക്ക് ഇത്ര മാത്രമേ പറയുവാനുള്ളൂ. ഇതിലെ 46 കവിതകളും ഒന്നിനൊന്ന് മെച്ചപ്പെട്ടതും വ്യത്യസ്തമായ വായനാനുഭവം സമ്മാനിക്കുന്നതുമാണ്. വാക്കുകളുടെ ലാളിത്യവും പ്രമേയങ്ങളുടെ തീക്ഷ്ണതയും കൊണ്ട് 'കടലൊഴിയുമ്പോൾ' എന്ന ഈ പുസ്തകം മലയാള കവിതാ രംഗത്ത് ശ്രദ്ധേയമായ ഒരിടം നേടുന്നുണ്ട്. കവിതകളെ അധികം പ്രണയിക്കാത്തവർക്കും ലളിതമായി വായിച്ചു തീർക്കാവുന്ന, എന്നാൽ ചിന്തകളിൽ ദീർഘകാലം അവശേഷിക്കുന്ന ഒരു നല്ല കൃതിയാണിത്. സിന്ധു സൂര്യയുടെ വരുംകാല കാവ്യയാത്രകൾക്ക് എല്ലാവിധ ആശംസകളും നേരുന്നു.